Bost foruzain hil dira gaur goizean Elgoibar parean (Gipuzkoa), AP-8 eta AP-1 errepideen arteko Maltzagako lotunean. 09:15 inguru zirela izan dute istripua, Ertzaintzaren Iurretako (Bizkaia) basera bidean; han zenbait material probatzekoak ziren, Ertzaintzak gonbidatuta. Istiluen aurkako brigadako kideak ziren, eta 35 eta 56 urte artean zituzten.
Ertzaintzak kontatu duenez, Foruzaingoaren furgonetak azukrea zeraman zisterna kamioi bat jo du, zergatik ez dakitela, eta furgonetako bost bidaiariak hil egin dira istripuan egindako zaurien ondorioz. Aurrerago, lekukoen bidez eta jakin ahal izan da furgonetak erdibitzailea jo duela, errepidearen erdian geratu dela, eta aurretik eraman duela kamioiak. Lau polizia unean bertan hil dira, eta bosgarrena suspertzen ahalegindu dira, baina ez dute lortu. Kamioiaren gidaria, berriz, Arrasateko (Gipuzkoa) ospitalera eraman dute larrialdi zerbitzuek, helikopteroan, eta Donostiara lekualdatu dute gero.
Istripua Bilboko noranzkoan gertatu da, baina kamioia erdibitzailearen gainean geratu da, eta Donostiako noranzkoan dauden bi lerrotara ere sartu da. Ondorioz, hasieran bi noranzkoetan itxi dute AP-8 errepidea, auto ilara luzeak sortu dira, eta AP-1etik desbideratu dute zirkulazioa. 10:40an ireki dute lerro bat Donostiarako bidean, eta, aldizka, pasatzen utzi diete AP-8 eta AP-1 errepideetako ibilgailuei. Arratsaldean, ordea, erabat zabaldu dute bi noranzkoetan, nahiz eta ezkerreko erreilak itxita jarraitzen zuen 69,5. kilometroan, garbiketa lanak egiteko.
Ikusi gehiago
Eguerdian hasi dituzte bi ibilgailuak erretiratzeko lanak, eta 19:00ak aldera amaitu dituzte. Bidegiren arabera, hiru garabi behar izan dituzte kamioia eta foruzainen ibilgailua errepidetik kentzeko.
Helikopteroaz gain, istripua gertatu den tokira bertaratu dira Ertzaintza, bi anbulantzia medikalizatu eta Azpeitiko eta Eibarko suhiltzaileen lau ibilgailu, erreskate lanetan laguntzeko.
Ertzaintzak ikerketa abiatu du gertatutakoa argitzeko, eta inguruan dabiltzan auto gidariei kontuz ibiltzeko eskatu die, auto pilaketa handiak daudela eta.
Jaurlaritzako Segurtasun Sailak ohar bat argitaratu du, eta egiaztatu du zenbait material probatzera zihoazela foruzainak Iurretara, Ertzaintzak gonbidatuta. Iurretako zentroa da Ertzaintzako istiluen aurkako unitateen egoitza, baita zaintza eta erreskate unitatearena eta lehergaiak desaktibatzekoarena ere.
Ekitaldi instituzionala
Berehala iritsi dira ezbeharrak eragindako lehen erreakzioak. Javier Remirez Nafarroako Gobernuko bozeramaileak jakinarazi du ekitaldi instituzional bat prestatzen ari direla hil diren «bost zerbitzari publikoei agurra emateko», eta xehetasunak zehaztuta dauzkatenean emango dutela haien berri.
Maria Txibite Nafarroako lehendakariak «nahigabetuta» dagoela idatzi du X sare sozialean, eta «maitasun guztia» helarazi die «galdu ditugun zerbitzari publikoen» senideei eta kideei. Imanol Pradales Eusko Jaurlaritzako lehendakariak ere «tristura, samina eta ezintasuna» sentitzen dituela adierazi du: «Besarkada handi bana, atsekabean lagun, senitarteko eta lagun guztiei, baita Foru Poliziari, Nafarroako Gobernuari eta Ertzaintzari ere. Goian eta gugan beude».
Remirezek esan du Pradales Txibiterekin harremanetan jarri dela, eta Bingen Zupiria Jaurlaritzako Segurtasun sailburua ere bai Inmaculada Jurio Nafarroako Gobernuko Segurtasun kontseilariarekin, eta eskerrak eman dizkie keinuagatik.
Unai Hualde Nafarroako Parlamentuko presidenteak, berriz, adierazi du hunkituta dagoela, eta doluminak eman dizkie hildakoen senitartekoei, lagunei eta Foruzain guztiei. Gauza bera egin du, besteak beste, Laura Aznal EH Bilduko parlamentariak, eta esan du gaurkoa «Nafarroako ezbehar kopuru larriari» gehitu beharreko beste bat dela, azken 40 orduetan hiru lagun hil baitira.
Alderdiek ere helarazi dizkiete doluminak hildakoen gertukoenei. PSNk «dolumin sakonenak» eman dizkie; EH Bilduk, «ezkerreko subiranismoaren babes osoa»; UPNk adierazi du buru-bihotzetan dutela Foruzaingoa; eta Geroa Baik ere bat egin du Foruzaingoarekin, «doluminik zintzoenak» igorriz.
ELA sindikatuak, berriz, samina adierazi die hildakoen senideei eta neurriak eskatu ditu halakorik gehiago gertatu ez dadin: «Lan osasunarekin lotutako politikak errotik aldatu behar dira, benetako prebentzioan eta lan baldintzen hobekuntzan oinarrituta».
